Sosial sahibkarlıq – Sosial sahibkarlıq sahibkarlığın təkamül edərək vizyona sahiblənmiş üst formasıdır. Əgər ənənəvi sahibkarlıq modeli gəlir qazanmaq fokuslu fəaliyyət göstərirsə, sosial sahibkarlıq həm də həmin gəlirin hansı sosial problemi həll edəcəyini düşünür. Nəticədə fəaliyyətin yekunu olaraq qazanc, cəmiyyətin yanlız bir fərdinin ehtiyaclarının qarşılanılmasına deyil, bir-biri ilə əlaqəli olan, sosial ekosistemin ayrı-ayrı fərdlərinin birlikdə faydalanmasına və beləliklə də sosial ədalətin qorunmasına sərf olunur.

Cəmiyyətin rifahına və güclü dövlətçilik siyasətinə birbaşa təsiri olan mənəvi dəyərlər məfhumunun inkişafına səbəb olan sosial sahibkarlıq anlayışı özü özlüyündə mənəvi dəyərdir. Sosial sahibkarlıq davamlılıq, genişmiqyaslılıq, yaradıcılıq, məsuliyyət, risk alma və cəmiyyət üzərində müsbət qalıcı təsirinə görə bir çox şirkəti investor olmağa şövq etməklə iqtisadi sferada da mənəvi dəyərlərin inkişafına qapı açır. Bunun nəticəsində sosial sahibkarlar yeni bazarlar, hədəf qrupları və iş üsulları ilə iş dünyasına əvəzsiz maddi və mənəvi innovasiya mənbəyi təqdim edirlər. Azərbaycan milli-mənəvi dəyərlərinin kökündə belə yaxşılıq, yardımlaşma, xeyriyyəçilik, filantropiya kimi ümdə anlayışlar əsas hərəkətverici qüvvədir.